首頁 / / 外遊有蛋用!實測CloudSIM免買卡免設定

外遊有蛋用!實測CloudSIM免買卡免設定

Magical 2018-10-06 17:54:14

12月尾又係時候旅行鬆一鬆,除咗要搞掂機票、酒店,另一樣都同樣重要梗係要解決上網問題!出去租漫遊蛋、買SIM卡又好似麻煩,用電訊商數據漫遊日費又嫌太貴,其實仲可以諗下近年興起的CloudSIM服務,只要有部設備喺手,免設定、免買卡就可以買流量上網,仲覆蓋主要城市、地區。

首先介紹的是GlocalMe,品牌旗下現時有兩款流動Wi-Fi產品,分別是走輕巧路線、卡片形的U2,以及設有篤芒、電量亦較多的G3。G3已經係GlocalMe第三代產品,機身備有4吋觸控螢幕,方便隨時查看Wi-Fi網絡、電量、剩餘數據等資料。此外,機身亦備有兩個nanoSIM卡槽,即使唔用CloudSIM服務都冇問題,非常靈活。值得一提的是,G3雖然重達240g,但就內置5,350mAh電池,提供長達15小時電量,並設有一個USB輸出可以為其他裝置充電。除了GSM、CDMA、WCDMA,GlocalMe G3亦支援FDD-LTE、TDD-LTE網絡,配合GlocalMe的CloudSIM服務,官方表示覆蓋歐洲、亞洲、非洲、南美洲、北美洲及大洋洲超過100個區域,常見的英、美、法、西、意、中、日、韓、台、泰等一律兼容。至於用法,用家可以透過官網或者《GlocalMe》手機App為帳戶增值,提供「按流量計費」及「流量包」兩個選擇,前者統一0.05歐元/MB,後者就分為區域而不同選擇,例如全球、多地區或者指定地區,以台灣為例,就有300MB/3歐元、1GB/5歐元、3GB/12歐元等。

講外形,屬Skyroam第二代產品的SOLIS就更加突出,橙色圓盒超Sharp;加上機身經過磨沙處理,手感、設計都頗有心思。機身不設螢幕,機側備有電源鍵,長按即可開關設備;而機面Wi-Fi圖示按鍵會顯示設備剩餘電量,按下即可啟動Wi-Fi功能。較特別是用家可以隨時扭開SOLIS機背殼,內藏兩枚18650電池,而電池底部亦備有一個microSIM,同樣可以當傳統流動Wi-Fi使用。SOLIS內置6,000mAh電池,提供16小時電量;背部設有USB Type-C插口,可為SOLIS充電或為其他裝置充電。一如大部分同類產品,SOLIS亦支援GSM、WCDMA、FDD-LTE、TDD-LTE網絡,而Skyroam的服務亦覆蓋超過100個國家及地區,包括北美洲、南美洲、歐洲、中東、非洲、亞洲及南太平洋。連接方面,開啟SOLIS後,根據貼紙上的Wi-Fi名稱、密碼連接網絡後,再以手機掃描貼紙上QR Code方可於瀏覽器登入Skyroam控制頁面,頁面可以查看接收、連接人數、裝置電量。至於收費,Skyroam提供包月以及全球日費兩款,前者價錢為125美元,後者就分1天(9美元)、5天(45美元)、10天(90美元)、20天(180美元)四款,無限數據用量,但就受公平使用條款約束。

實測環節就選擇港人常去的台北,GlocalMe G3、Skyroam SOLIS買流量計劃都非常方便,用量唔多的朋友相信前者更啱用,皆因提供多款不同流量的套餐,就以記者購買的台灣3GB套餐,剩餘的數據流量可以保留30天,撞正朋友出遊就可以連裝置、套餐一併借出,更慳錢。而SOLIS因為採用日費計算,24小時內無限數據,高用量的用家就更適合;而且屬全球計劃,假設中午落機返到香港,繼續使用同一日費計劃都得。再於台北地下街進行簡單測速,G3平均上、下載速度分別28.24Mbps、22.45Mbps,SOLIS平均上、下載速度分別2.3Mbps、32.6Mbps,下載速度以SOLIS較高,但如果需要上載速度G3又有大幅優勢。


本文來源:http://hk.on.cc/hk/bkn/cnt/lifestyle/20171221/bkn-20171221115938185-1221_00982_001.html

Tag:
本文鏈接:http://www.852dating.com/56509.html